تقريباً لو بصينا لمعظم المشاكل اللي بتحصل حوالينا هنلاقي سببها عدم احترام القانون والنظام , عدم تقدير الذات, و غياب الضمير . 3 حاجات مخلية عيشتنا و أيامنا سودة ومهببة. وأكيد مش هتكلم في أسباب ال 3 حاجات دول لأني معرفهمش و الموضوع متغير من شخص للتاني وإن كان في النهاية مفيش أي عذر أو سبب لاختفاء الـ 3 حاجات دول مننا كبني آدمين بس الـ 3 حاجات دول ممكن يعملوا حاجات تسهل حياتنا بشكل كبير لو التزمنا بيهم وحقيقي مش هتأثر على حياتك كبني آدم لما تعملها بالعكس هترحمك من قرف كتير.
المواطن : عارف إنك بكل بساطة لو ممشيتش عكس الاتجاه مش هتتغرم أي حاجة لو لبست في أمين شرطة أو كمين قدام؟ يعني لاهتدفع رشوة ولا هتدفع مخالفة ولا حد هيكلمك أصلاً. ده حتى مش هيأثر في بنزين عربيتك ولا هيشل رجلك اللي بتدوس على دواسة البنزين.
عارف إنك لو التزمت بالسرعة المقررة هتوصل برضه وبسلام وأمان. النص ساعة اللي انت عايز توصلها بدري ممكن تتسبب في كذا حاجة , يعني ممكن تتلقط رادار وتلبس مخالفة, يعني ممكن لا قدر الله يحصل أي حاجة في العربية وتعمل حادثة, يعني ممكن لأي حاجة طارئة تحصل على الطريق قدامك تعرض نفسك للخطر بسرعتك الزايدة وانك معرفتش تتفاداها. مبقولكش تمشي على 20 بس التزم بسرعة الطريق واحمي نفسك وغيرك.
الظابط : عارف إنك لو ابتسمت في وش الناس هتبقى راجل محترم ومحدش هيتضايق منك؟ الموضوع بسيط وسهل إنك متعاملش الناس بجفاء لأن الناس طهقانة وانت كمان طهقان. ريّح واستريّح واللي يغلط طبق عليه القانون مهما كان غني أو فقير.
المواطن: عارف إنك لو مسرقتش الكهربا مش هترجع تشتكي من قطعها بعد كده؟ حضرتك كصاحب محل وعامل مهرجان حوالين محلك علشان تبهر الناس وتبهر غرور نفسك أو فارش في الشارع تسترزق وبتسرق كهربا من العمود علشان تنور 15 لمبة وياريتهم موفرين حتى. ممكن تروح بيت حضرتك تلاقي تلاجتك وتلفزيونك محروقين من قطع الكهربا ورجوعها بزيادة, يعني في الصيف أهلك ممكن يفضلوا لا لاقيين هوا مروحة ولا مكيف وانت سارق الكهربا.
الدولة: واضح انكم بتحاولوا بس مش كفاية, مهما كان السبب فلازم يكون في حل, الطبطبة على عدم احترام القانون علشان تتفادى زعل فئة معينة مش هتوفرلك متطلباتك. اللي سارق الكهربا و سارق ميه اللي مش هنلاقيها قريب واللي شاغل الطريق واللي ماشي عكس الاتجاه واللي ماشي غلط أصلاً كل ده لازم يتطبق عليه القانون. امال القانون معمول ليه؟ وصلنا في الآخر اننا مفيش أي حاجة سليمة لا كهربا ولا طرق ولا مرافق ولا خدمات وكله بسبب عدم تنفيذ القانون على المخالفين والطبطبة والرشاوي والفساد. في محاولات بس مش كفاية ولازم يكون شغل أكتر. تأمين الطرق الفاضية اللي الناس بتتثبت عليها ليل نهار وبتموت و التفكير في حلول لوسائل النقل العام بدل ما بتنزلوا أوتوبيسات وبس وبتزحموا الشارع أكتر بدون حل المشكلة واللي هي بتخرب أصلاً بعد سنة من استخدامها. صيانة المرافق اللي بقت متهالكة و توفير أماكن للباعة الجائلين علشان تنضفوا ميادين البلد. تحصيل الفواتير اللي الناس مبتدفعهاش واللي ميدفعش يتقطع عنه الخدمة لحد ما يدفعها و مكافحة سرقة الكهربا في المناطق اللي مستوى معيشيتها كويس وتلاقي فلل سارقة كهربا علشان تشغل خمس ست مكيفات … مشاكل حلولها بسيطة والمطلوب مراعاة الضمير واحترام ذات البني آدم اللي عايش.
المشاكل كتير وأكيد مش هتتقال كلها بس دي أمثلة بسيطة من حياتنا اليومية , التمرد على القانون مش صياعة لأن كل غلطة بتعملها بتتردلك بعد كده في حاجة تانية.